Луис Суарез официјално доби одобрение од лекарите за да може повторно да игра натпревари за клубот од „Камп Ноу“.

Пет месеци по операцијата на десното колено, потврдено е од редовите на Барселона дека уругвајскиот интернационалец може да биде на располагање кај тренерот Кике Сетиен после 147 дена пауза.

Воедно каталонската екипа потврди дека може да смета на Суарез веќе на првиот меч после паузата поради пандемијата на коронавирус. Барса на 13 јуни според програмата треба да гостува кај Мајорка на македонскиот репрезентативец Александар Трајковски.

Последниот настап го имаше против Атлетико Мадрид на почетокот на јануари во полуфиналето во шпанскиот Суперкуп. Оваа сезона досега запиша 14 голови во 23 натпревари, во лигата 11 пати се запиша во листата на стрелците и трипати во ЛШ.

И покрај тоа што ги пропушти последните осум лигашки натпревари за Барса, Уругваецот има седум асистенции, односно на третото место во „Ла Лига“.