Во Специјалната болница за гинекологија и акушерство „Мајка Тереза“ – Чаир денеска беше промовирана новата онлајн услуга – електронска регистрација на новороденче. Со новата услуга, родителите ќе имаат можност електронски да поднесат барање за упис на нивното новороденче, без да одат до шалтерите на УВМК.

Услугата ја промовираа министерот за информатичко општество и администрација, Азир Алиу, заедно со министерот за здравство, Фатмир Меџити, генералниот директор на Управата за водење на матичните книги, Емир Сулејмани и директорот на Гинекологија, д-р Башким Исмаили

-Аплицирањето преку услугата “eID” на веб-страницата Услуги ќе овозможи поднесување на барање за овој извод, лесно и без доцнење, рече Алиу.

Според министерот Алиу, дигитализацијата е единствениот начин да се промени животот на граѓаните. Тој  посочи дека до крајот на годината ќе се промовираат повеќе од 150 нови онлајн услуги на Националниот Портал за е-Услуги.

-Ние како Министерство работиме напорно за дигитализација и дигитална трансформација на државата, каде што неодамна ја промовиравме „ДигиталнаЕра“- новата платформа на МИОА, која носи зголемување на електронските услуги за граѓаните и администрацијата. До крајот на годината ќе дигитализираме повеќе од 150 нови онлајн услуги на Националниот портал”, рече министерот Алиу, нагласувајќи дека тоа ќе значи пократко време и намалени трошоци за добивање на овие услуги, но и зголемување на довербата на граѓаните кон институциите.