Бараа помош од државата, а сега прават трансфер од пет милиони евра
Екипата на Базел е еден од трите клуба во Швајцарија кои се натпреваруваат во Суперлигата и аплицираа за помош од државата поради пандемијата на коронавирусот. Останатите две екипи кои бараа финансиска помош се Сион и Цирих, но токму екипата на Базел се најде на удар на јавноста но и политичарите во Швајцарија бидејќи сака да ангажира засилување вредно пет милиони евра.
Станува збор за 18-годишниот аргентински фудбалер Матијас Паласиос кој се смета за еден од најголемите таленти во светот, но таа идеја не им допадна на политичарите и јавноста кои не можат да разберат зашто екипата бара финансиска помош, а сега сака да плати пет милиони евра за трансфер. Трансферот сè уште не е реализиран, и се чини дека под притисок на јавноста ќе мора да се откаже од оваа идеја.
– Ок, ова сега е апсурдно. Да, „пакетот за прва помош“ е тука за да се искористи, и да, политичарите се тие кои ги условија клубовите парите да ги потрошат само кога е итно, Но, тоа не го прави Базел. Колку бесчуствителни треба да бидат за да направат нешто вакво“, напиша еден од челниците на градот, Бед Баумгартнер.
Сличен став имаат и други политичари кои го нападнаа претседателот на клубот, Бернхарт Бургенер.
– Базел доби помош од државата бидејќи Бургенер очајно си ја работи својата работа. Клубот подобро би функционирал без него – изјави Жоел Туринг, висок функционер на Кантонот Базел.
Од клубот ги отфрлија обвинувањата за расипништво и порачаа дека финансиската помош е да се надоместат загубените приходи од тоа што натпреварите се играат пред празни трибини.
„Трансферите се важен дел од професионалниот спорт, вложување во иднината и исто така се од голема економска важност. Базел во минатото покажа дека води успешна трансфер политика и така остварува приходи. Во ова време ни недостасуваат приходи од продажба на влезници и секој клуб е приморан да продолжи да се обидува да создаде успешна спортска и финансиска иднина“, одговорија од Базел на обвинувањата.