Мистериозно исчезналo вашeто куче-миленик и се обидувате да го најдете во маалото или со апели преку социјалните мрежи. Најверојатно дека нема да успеете да го најдете, зашто зад најголемиот број исчезнати кучиња стои добро организирана банда од скопската приградска населба Злокуќани.

За постоењето на криминалната дружина знае и полицијата, но се уште не може да ги фати на дело и да ги казни крадците на најчесто скапи, расни кучиња.
Бандата дејствува во три групи. Една се „грижи“ да процени од каде да се украде кучето, втората група се обидува да му го (пре)продаде на сопственикот од кого е украдено (ако кучето не атрактивно), а третата група има задача да го препродаде, ако е силно, на тие што организираат борби со кучиња. Организаторите преку социјалните мрежи испраќаат испраќаат покани за крволочните борби од типот: „Моето куче е посилно“. Такви „познати“ терени има во Прилеп, Гостивар и во Тетово.

Заработувачката од добиена борба или обложување може да достигне и до 10.000 евра. Набарани раси се шарпланинци, кангали, кучиња-борци и питбули, иако интересирањето за нив е се послабо.  

Од полицијата велат дека тешко е да се откријат, а уште потешко да се докажат ваквите нелегални дејанија. За да се покрене кривична одговорност треба наод од ветеринар, а ниту еден ветеринар не се осмелил да пријави куче кое е повредено во борба. Поради тоа ваквите дела, и кога ќе се откријат се казнуваат прекршочно. Полицијата потсетува дека организирањето борби со кучиња е кривично дело мачење животни за кое е предвидена казна од 500 до 1.000 евра, па и затвор. Обложувањето за време на овие борби е исто така кривично дело.

Законот вели дека кучињата кои се затекнати во организирана борба се одземаат и привремено сместуваат во прифатилиште заради спроведување на мерки предвидени со прописите од ветеринарното здравство и со цел повторно да биде здомено.