Балетскиот педагог Искра Шукарова како кореограф и предавач гостува во Рига
Македонската балерина и балетски педагог Искра Шукарова како кореограф и предавач гостува на интернационалниот фестивал за современ танц „Laiks dejot 2021“ во Рига, Латвија, кој се одржува од 18 до 24 август во „Eduarda Smilga Theatre“.
На фестивалот Шукарова премиерно го презентираше своето ново дело „Децентрализирана циркулација“. Делото ги истражува изведувачките модалитети на глас и движење, тема што последниве години ја инспирира Шукарова како автор.
Во текот на својот престој во Рига, од 21 до 23 август, Шукарова одржува и мастер клас наменет за студенти и професионалци во полето на современиот танц во Латвија.
Организатор и уметнички директор на фестивалот е Олга Житлухина, која е една од основачите на Латвиската современа танцова сцена.
(Текстот е објавен во „Културен печат“ број 94, во печатеното издание на „Слободен печат“ на 21-22 август 2021)