Сегашниот обвинител Џелал Бајрами, кој во време која се случи масакрот кај Смилковско Езеро беше заменик-министер за внатрешни работи, на денешното сведочење во процесот „Монструм“ нагласи дека на прес-конференцијата за јавноста во врска со петкратното убиство тогашната министерка за внатрешни работи Гордана Јанкулоска, излегла со информации надвор од договореното и ги обвинила и осудила приведените.

– Беше договорено дека полицијата имала акција и извршила претрес на повеќе локации во и надвор од Скопје и дека има индиција дека лицата кои се приведени се можни сторители, но надвор од сето тоа што беше концепт, Јанкулоска ги осуди приведените. Потоа следуваше тензична ситуација. Ѝ реков на министерката дека ние не сме орган да утврдува кој е сторителот на тоа кривично дело, туку дека тоа е судот – рече Бајрами.

На прашањето на обвинителката Фатиме Фетаи дали заменик министерот може да го информира политичка партија, Бајрами рече:

„Секако дека немам таква обврска. Сме имале со лидерот на ДУИ само неформални разговори за истрагата“.

За следното рочиште кое е закажано за 27 овој месец ќе сведочат Сашо Мијалков, Синиша Алексовски, Блерим Беџети, Муса Џафери и Зоран Трајковски.