Бајката во Јувентус пред крај: Пирло пред отказ, добро познато име се враќа на клупата?!
Управата на „Старата дама“ по слабиот старт на сезоната се поинтензивно размислува да се раздели со тренерот дебитант Андреа Пирло.
Изминатото лето Јувентус ја шокираше јавноста кога му врачи отказ на тренерот Маурицио Сари и го замени со клупската легенда која е тренер-дебитант, Андреа Пирло.
Стравовите дека Пирло сè уште не е искусен за да води екипа каква што е Јувентус иако беше неверојатен фудбалер, се остварија и „старата дама“ на почетокот од сезоната бележи лоши резултати во сите натпреварувања.
Како што пренесуваат италијанските медиуми, управата сè уште му дава поддршка на Пирло, но во исто време и размислува за можните замени доколку продолжат лошите резултати.
Главен фаворит за евентуален наследник на Пирло е поранешниот тренер на Јувентус, Масимилијано Алегри кој има одличен однос со претседателот на тимот, Андреа Ањели кој пак одлучи од оваа сезона да им ги намали ингеренциите на директорите Павел Недвед и Фабио Паратичи.
Алегри со успех го предводеше Јувентус од 2014 до 2019 година, екипата триумфира сите пет сезони во Серија А, но не успеа да го освои трофејот во Лигата на шампионите и токму поради тоа ја заврши епизодата во „старата дама“.
Сезонава Јувентус по пет одиграни кола во Серија има само две победи и три нерешени резултати, од кои два се против аутсајдерите Верона и Кротоне. Во Лигата на шампионите екипата има скор од еден триумф и еден пораз.