Бајиќ: Седум промашени слободни фрлања, правевме грешки, но ништо не е загубено
Драган Бајиќ дебитираше на кормилото на македонската сениорска машка репрезентација со пораз од Швајцарија во првиот натпревар од претквалификациите за СП 2023.
– Јас и вчера кажав, на тренингот почувствував некоја нервоза во тимот и поради тоа сметам дека дојдовме до некои грешки во играта. Тоа што вечерва го забележав е дека влеговме во некој огромен грч поради кој останавме без енергија и без сила, а со самото тоа и без концентрација.
Многу промашени зицери, сигурно некои осум-девет лесни поени, седум промашени слободни фрлања што можеби на крајот и беше пресудно кога во вториот дел успеавме да ја намалиме разликата, но и покрај тоа правевме грешки. Не се снаоѓавме добро со нивната одбрана.
Не губиме многу со овој пораз, треба да се анализира натпреварот, да се регенерираме и да се обидеме да ги победиме преостанатите натпревари – кажа селекторот на нашата репрезентација по мечот со Швајцарија.
Следниот дуел ќе го имаме в сабота (14 август) од 19.00 часот против Словачка.