Претседателскиот кандидат на американските демократи Џо Бајден изјавил дека носењето на маски во јавноста за спречување на ширењето на коронавирусот покажува лидерство и воедно го нарекол „будала“ својот републикански ривал и актуелен претседател на САД, Доналд Трамп заради тоа што го прави спротивното.

Бајден за време на пандемијата останал во својот дом во Делавер и ја замрзнал претседателската кампања. На Денот на сеќавање тој за прв пат од март се појавил во јавноста носејќи црна маска, наведува Ројтерс.

Тоа го привлекло вниманието на Трамп кој на Твитер ја објави фотографијата на Бајден со коментар: „Ова би можело да помогне да објасни зошто Трамп не сака да носи маска во јавност“.

Трамп и понатаму на јавни манифестации одбива да носи заштитна маска.

– Тој е будала, потполна будала, што така збори. Тој би требал со своето лидерство да даде пример. Дури и врвните светски лекари велат дека би требало да се носи маска во гужва, рекол Бајден за Си-Ен-Ен.

Тој однесувањето на Трамп го окарактеризирал како „мачо глупости“, а таквата пракса „лажно мажествено“ однесување кое ги чини луѓето животи.