Славеничкиот, 35 години јубилеен концерт на „Бајага и инструктори“ ќе се случува в недела, на 13 септември, на стадионот АРМ во Скопје, на отворено. Ова ќе биде прв концерт на Бајага откако започна пандемијата со ковид -19.

– Нашиот план беше многу порано да го направиме овој концерт, во декември направивме четири концерти во Сава Центарот со белградската филхармонија и со белградскиот хор, а планот беше овде да го реализираме концертот со македонскиот оркестар и со македонскиот хор. Мислам дека ќе биде многу интересен концерт – рече Бајага на прес конференцијата одржана денес.

Направен е избор на најголемите хитови кои ги имале „Бајага и инструктори“ во кариерата, односно ќе чуеме песни кои одлично звучат со голем оркестар. Направени се аранжмани за 22 песни кои сега ќе ги чуеме како звучат поинаку. Меѓу нив се, секако, и хитовите „Моите другари“, „Замижи“, „Рускиот воз“.

Бендот ќе настапи во стандардниот состав. Од почетокот на кариерата, во „Бајага и инструктори“ биле променети само два члена, додека останатите членови се со Бајага од 1984 година.

– Ретко ги менувам музичарите, вели Бајага, и додава дека во тоа е можеби и тајната за успешноста на бендот.

Во меѓувреме, за време на коронакризата, Бајага го завршил и новиот албум „Овој свет се менува“, кој десетина дена после скопскиот концерт би требало да излезе во продажба. На албумот има неколку нови песни и уште неколку песни кои ги работел за други изведувачи, а овојпат сам ги отпеал. Има и песни кои ги пишувал за Здравко Чолиќ, но се во сосема нови аранжмани, како и песни пишувани за претстави.