Иван Перишиќ нема долго време да се задржи во Баерн Минхен, тврди германскиот весник „Билд“ кој не греши кога станува збор за информациите поврзани со германскиот шампион.

Баварците одлучија дека на крајот од сезоната нема да го откупат договорот на Перишиќ и ќе го вратат во Интер. Челниците на екипата не се задоволни од учинокот на Перишиќ кој на 12 натпревари во Бундес лигата постигна само три гола и имаше три асистенции, додека во шесте натпревари во Лигата на шампионите постигна еден гол и оствари три асистенции.

Баварците исто така не се задоволни ниту од вториот фудбалер кој настапува како позајмен фудбалер, Фелипе Кутињо. Баерн нема намера да плаќа 120 милиони евра обесштетување за Бразилецот и ќе го врати во Барселона по завршување на сезоната.

Освен со позајмените фудбалери, челниците се подготвени да се разделат и со уште неколку играчи кои се „сенатори“ во клубот. Се поизвесно е дека на лето ќе си замине и голманот Мануел Ноер. Ноер е незадоволен со купувањето на талентираниот германски голман Александер Нубел од Шалке на кого му е ветено дека ќе добие минутажа на помалку важните натпревари.

Ноер не е расположен да му го отстапи местото помеѓу статитвите на Нубел, но спортскиот директор Хасан Салихамиџиќ се спротивстави на ваквиот предлог на стандардниот голман на Баерн и на германската репрезентација. По ваквиот расплет на случаите, Ноер му наложи на својот агент да започне преговори со Јувентус за евентуален летен трансфер.

„Билд“ пишува дека на излезни врати се уште и долгогодишните првотимци Жером Боатенг, Хави Мартинез и Тиаго Алкантара, а најголема заработка во летниот преоден рок се очекува да донесе Давид Алаба.