Баерн ја реши дилемата, Флик останува тренер
Челниците на Баерн Минхен по неколкунеделни размислувања и преговори со евентуалните наследници на Нико Ковач, одлучија привременото решение, Ханси Флик да добие договор до крајот на сезоната.
Ова значи дека баварците нема да бараат тренер за време на зимската пауза и ќе му дадат шанса на Флик.
– Баерн Минхен е задоволен од работата на Ханси Флик, резултатите по неговото доаѓање се според очекуваното, а шесте победи во шесте натпревари во ЛШ поставија клупски рекорд. Веруваме дека Баерн Минхен со Флик на клупата ќе освои многу трофеи оваа сезона – изјави претседателот на Баерн, Карл–Хајнц Румениге.
Тренерот веста дека ќе остане на клупата на Баерн ја дозна по триумфот над Волфсбург (2:0).
– Успеав да ја добијам довербата на раководството до крајот на сезоната и ќе се трудам максимално да ја оправдам. Навистина уживам во работата со фудбалерите, имаме одличен тим и ќе се бориме за трофеи на сите фронтови. Сега треба да ги наполниме батериите и да се подготвиме добро за предизвиците во 2020 година – изјави Флик.