Тренерот на Е. Пелистер, Жељко Бабиќ, смета дека поразот од 24:32 во првиот осминафинален натпревар е сосема заслужен бидејќи Магдебург беше поквалитетен ривал. Високиот пораз значи и елиминација на битолчани од Лигата на Европа бидејќи речиси неверојатно е Е. Пелистер да го победи фаворитот на негов терен и тоа со девет гола. Далеку поважен натпревар за Е. Пелистер е саботното дерби со Вардар во домашното првенство.
– Честитки за победата, честитки за тренерот. Тргнавме многу бавно, бевме предвидливи во нападот, а со таква игра против вака квалитетен тим знаеш дека ќе бидеш казнет. Игравме пречесто во овој период и можеби затоа ја загубивме силата на овој меч. Но, треба да се напомене дека игравме против одлична екипа, која е составена од голем број медалисти од големите натпреварувања. Ни следи важен меч со Вардар во домашниот шампионат, а потоа и реваншот во Германија. Штета што не успеавме да уловиме голема риба како што најавивме – изјави Бабиќ на прес-конференцијата по натпреварот.