Баба Фикрије Љоки од Тетово, родум од Косово, поминала низ многу премрежија – војни, голема сиромаштија, преселби, самотија, губење на најблиски, па и на нејзиното чедо, постариот син, но борбата и волјата за подобро утре ја одржува во животот, пишува ММС.мк

Баба Фикрије има 107 години, родена е на 10 јануари 1914 година и таа е меѓу најстарите жители на земјава.

Баба Фикрие сега има 12 внуци, кои ги добила од трите деца. Едниот син бил гастарбајтер и починал од рак во Данска, каде сега живеат неговата сопруга и децата. Нејзината ќерка е омажена во гостиварски Калник. Сега во оваа голема куќа на три ката во Тетово таа живее со помладиот син Раим. И тој е печалбар, сопругата и трите деца му се во Швајцарија, но тука во Тетово дошол да се грижи за неговата долговечна мајка.

-Да дојдевте пред три месеци ќе ја затекневте во одлично здравје, и физички и умствено. Но, пред три месеци мајка ми доби излив, па памтењето не ја служи многу, и не е толку подвижна како порано, вели нејзиниот помлад син Раим.

Тој вели дека баба Фикрије била и маж и жена во семејството. Откако со нејзиниот сопруг дошла од Косово во Македонија во 1956 година ,заедно се грижеле за децата, но тој после седум години починал и оттогаш, од 1963 година, се било на нејзин товар.

-Нејзината активност, борбата и грижата за нас можеби е рецептот за нејзинот долг живот. И гените се пресудни, затоа што и нејзините седум сестри живееле над 90 години, вели за ММС нејзиниот син Раим.

Таа никогаш од ништо не се откажала, се што замислила, посакала и рекла остварила. Раим вели дека Господ ја чувал, оти „знаел дека за нас го мисли и го прави најдоброто“.