Еден војник од Азербејџан е убиен денеска во снајперски напад од ерменските вооружени сили на границата меѓу двете земји, соопшти Министерството за одбрана на Азербејџан, додека ерменските власти го демантираат инцидентот.

„Попладнево е убиен војник“ во областа Келбаџар. Нападот бил од селото Кут во Ерменија, соопшти Министерството за одбрана на Азербејџан, додавајќи дека неговите вооружени сили преземаат одмазднички мерки.

Ерменија негираше каква било вмешаност, а нејзиното Министерство за одбрана на Телеграм потврди дека изјавата дека „ерменските единици отвориле оган врз позициите на Азербејџан не соодветствува со реалноста“.

По минатонеделната молскавична офанзива на Азербејџан и капитулацијата на ерменските сепаратисти од Нагорно-Карабах, властите на енклавата во четвртокот донесоа историски декрет за нејзино распуштање на 1 јануари.

Вкупно, по воената офанзива на Азербејџан биле пријавени околу 600 загинати, додека во борбите загинале околу 200 војници од двете страни.

Речиси сите жители на Нагорно-Карабах ја напуштија областа и отидоа во Ерменија поради страв од репресалии од Азербејџан.

Ерменија и Азербејџан влегоа во војна во 2020 година за контрола на Нагорно-Карабах, а конфликтот заврши со мировен договор со помош на Русија, која ја призна победата на азербејџанските сили.

Нагорно-Карабах, планинска територија населена главно со Ерменци, се отцепи од Азербејџан, што доведе до војна која однесе 30.000 животи во 1990-тите.