Челси продолжува со одличните партии во последно време и во последниот натпревар од 33 коло на Премиерлигата го совлада градскиот ривал Вест Хем со 2:0 и дојде до третата позиција на табелата.

Главен „виновник“ за третата победа по ред е Еден Азар кој беше стрелец и на двата гола за неговиот тим. Првиот гол го постигна во 24. минута кога ја прими топката на 40-тина метри од противничкиот гол, успеа да помине неколку противнички играчи и со прецизен шут од срцето на шеснаесетникот ја затресе мрежата на Фабијански. Гонзало Игуаин имаше шанса да постигне уште еден гол за „сините“ но ја погоди стативата.

Конечниот резултат го постави Азар во 90. минута со што го однесе Челси на третата позиција на табелата со 66 бодови, два повеќе од Тотенхем кој има и натпревар помалку.