Екипата на Металург конечно пристигна во Шпанија до каде патуваше 43 часа и тоа со автобус. Поради пандемијата на коронавирусот, тимот од Автокоманда не можеше да организира авионски превоз до Леон и поради тоа се одлучи викендов да тргна 40-часовен пат со автобус.

„По 3000 км, поминати за 43 часа, Металург конечно пристигна во Леон.
Авантурата на Металург која предизвика огромен интерес во ракометниот свет, среќно заврши пред вратите на хотелот во кој ќе биде сместен нашиот тим. Сите ракометари се добро, сите се расположени и со нетрпение го очекуваат утрешниот натпревар. Утре наутро Металург веројатно ќе го искористи своето право за полесен тренинг, колку да ја осети подлогата во “Палатата на спортовите“ во Леон“, објави Металург на официјалната интернет страница.

Натпреварот од Лигата на Европа со Адемар Леон се игра утре, со почеток во 20.45 часот.

Ракометарите на Металург со автобус ќе патуваат за Шпанија