Најмалку 24 лица загинаа, а 21 се повредени во сообраќајна несреќа во Перу, кога автобус падна во провалија длабока 200 метри, јави Би-Би-Си.

Несреќата се случила во текот на ноќта високо на Андите, автобусот се движел од Хуанкај кон Хуанте, а причината за несреќата засега не е позната.

Градоначалникот на Хуанте изјави за локалното радио дека патот каде што се случила несреќата не е поправен откако пред еден месец бил оштетен во одрон.

Мештаните први пристигнале на местото на несреќата, изјавиле дека за среќа автобусот застанал во грмушките, чии гранки го спречиле да падне во реката на дното на клисурата.

Пожарникарите од Хуанте успеале да ги извлечат повредените патници од автобусот и да ги пренесат во болница.

Сообраќајните несреќи во Перу се многу чести и според официјалните податоци минатата година на патиштата загинале повеќе од 3.300 луѓе.