Претседателот на Австрија, кој се кандидираше за нов мандат, Александар ван дер Белен, призна дека е грешка што не се диверзифицираат изворите на гас и посочи дека дозволил рускиот претседател Владимир Путин да го измами, како што го „измамил и целиот свет“.

Ван дер Белен во интервју за телевизијата „Пулс24“ беше прашан за претходните изјави каде тој рече дека е „лесно да се разговара со Путин“, објаснувајќи дека е лесно да се разговара со него бидејќи зборувал на германски и дека за време на посетата бил заинтересиран за неговата семејна историја, која е поврзана со Русија.

-Или тој веќе планираше колонијалистичка агресивна војна или се промени во текот на изминатите години. Сигурно не е важно што е, верувам дека Путин ме измами мене, како што го измами целиот свет – објасни тој.

Во врска со се почестите критики за санкциите, Ван дер Белен рече дека сега не е време да се размислува за нивно прекинување.

– Тие санкции се ужасно штетни за Русија, а војната во Украина исто така влезе во фаза кога е јасно дека Путин очигледно погрешно ја процени ситуацијата. На почетокот сигурно мислеше дека брзо ќе го освои Киев, но сега бележи загуби. Ситуацијата дополнително ја влоши делумната мобилизација во Русија, која предизвика стотици илјади млади луѓе да ја напуштат земјата. Путин направи грешки во неколку прашања. Не ми е јасно што прави руската разузнавачка служба, или можеби Путин не и верува – рече тој.