Најголемото изненадување во првото коло го направи финскиот тенисер Емил Русувуори кој го елиминира поранешниот шести тенисер на светот, Гаел Монфилс кој по поразот не можеше да ги запре емоциите.

Монфилс загуби со 3:2 во сетови и тоа со 3:6,6:4,7:5,3:6,6:3, по што на прес конференцијата не можеше да ги запре солзите.

– Сакам да излезам од овој кошмар… Немам самодоверба, играм слабо, не можам да сервирам, не можам да удрам форхенд како што сакам. Зошто? Навистина не знам, сигурно има милион причини, но најважната е што немам самодоверба. Барам само малку милост, не сакам да се фрла со камења по мене. Се обидувам, работам, но не ми успева. Би сакал еден ден да се разбудам и да кажам пред сите вас дека овој кошмар е завршен, но еве ме овде повторно. Кога некој е долу, немојте да го газите – изјави Монфилс.

Сигурен старт на Австралија Опен имаше актуелниот вицешампион Доминик Тим кој во три сета со 7:6,6:2,6:3 го елиминира Михаил Кукушкин, додека далеку поинтересено беше на дуелот на еден од фаворитите за пласман во финалето, Александер Зверев.

Шестиот носител Зверев во првите два сета имаше брејк предност (4:2,5:2) но не успеа да ја сочува предноста и во двата сета се играше тај брејк. Првиот тај брејк му припадна на Американецот Маркос Џирон со 8:10 и тоа предизвика излив на бес кај Германецот. Зверев бесот го искали на рекетот по што почна далеку подобро да игра и наредните три сета ги реши во своја корист со 7:6,6:3,6:2.

Сигурен настап во првото коло имаа и Милош Раонич кој со 6:3,6:3,6:2 го победи Федерико Корија и тоа за 93 минути игра, како и Станислас Вавринка кој за 96 минути го елиминира Педро Соуса со 6:3,6:2,6:4.
Сигурен настап имаа и Рејли Опелка, Адријан Манарино како и Тејлор Фриц.

Во женска конкуренција, Серена Вилијамс со убедливи 6:1,6:1 против Лаура Зигемунд ги започна ловот на 24. грен слем титула. Шампионката од Ролан Гарос, Ига Швјонтек со 6:1,6:3 ја совлада Аранча Рус, како и тројната грен слем шампионка Наоми Осака кој со 6:1,6:2 ја победи Анастасија Пављученкова.
Австралија Опен заврши за поранешната шампионка, Анџелик Кербер која е елиминирана од 63. тенисерка на ВТА ранг листата, Бернарда Пера и тоа со 0:6,4:6.