Петтото издание на фестивалот „Скопје колинг“ ќе се одржи на 12 септември на стадионот на АРМ, а вниманието ќе биде насочено кон пионерите и кон младите сили на домашната музичка сцена. На концертот ќе настапат „Фолтин“, „Ласт експедишн“, „Фанк шуи“ и „Плутос даубтс“.

– „Плутос даубтс“ се тука да ни ја пренесат новата шармантна скопска авангарда, „Фанк шуи“ да ни ја доловат нивната експлозивна енергија на сцена, „Ласт експедишн“ да ни покажат на што работеле за време на долгогодишната музичка пауза и да нѐ потсетат што значи да се биде „добрата стара школа“, а „Фолтин“ со „Лејт најт кабаре перформанс“ да ни покажат, барем на час и половина, како е да се живее младешки без обѕир, раскошно, блудно и некомерцијално – најавија од „Авалон продукција“.

Настанот ќе биде реализиран според сите протоколи за заштита од ковид-19, а носењето заштитни маски ќе биде задолжително за сите, потенцираат од „Авалон“.

(Текстот е објавен во „Културен печат“ број 48, во печатеното издание на „Слободен печат“ на 12-13 септември 2020)