Авалон го сели концертот на DEEP PURPLE на друга локација
Поради најавеното дождливо време на 27-ми и 28-ми мај, а во консултација со менаџментот на DEEP PURPLE, се одлучивме за сигурна варијанта- префрлување на концертот во арена “Борис Трајковски”, истиот ден, во сабота на 28-ми мај, соопшти организаротот на концертот Авалон на својата Фејсбук страница.
-Тоа е впрочем и одлична вест, затоа што сите со купени влезници досега, како и сите оние кои ќе купат отсега, ќе може да бираат дали сакаат да го следат концертот од седење или од стоење, и тоа по овој распоред: ФАН ПИТ: Сите што имаат купено фан пит влезници може да стојат во својата омилена зона- пред бината или да седат на останатите ненумерирани трибини- по свој избор. ПАРТЕР: Сите оние што имаат купено партер влезници може да стојат во партер зоната или да седат на останатите ненумерирани трибини- по свој избор. ВИП:Сите оние што имаат купено Вип влезници ќе може да седат во ВИП трибината (блок 13), објаснуваат од Авалон.
Оттаму додаваат дека со ова се исполнува желбата на голем број и на сите оние што прашувале дали на стадионот на АРМ ќе има столчиња или трибини, што пак таму било невозможно.
-Сега на новата локација, и тоа е возможно. Имено, во продажба според капацитетот на арената “Борис Трајковски” има уште 1.500 влезници кои ќе се продаваат до концертот по истиот принцип (партер и фан пит), но и со тие влезници ќе може да се седи, секако по желба на купувачот. Се гледаме за четири дена со уште поголема енергија, но на нова локација!, соопштија од Авалон.