Атомски тенис во Торино, Медведев во три сета го победи Зверев
Во првиот натпревар од второто коло во црвената група на завршниот мастерс во Торино, Данил Медведев во фантастичен меч го совлада Александер Зверев во три сета и тоа со 6:3,6:7,7:6.
По две кола, рускиот тенисер има две победи, додека Зверев има половичен ефект, по една победа и пораз.
Мечот помеѓу вториот и третиот светски тенисер започна со одлична игра на Медведев кој веднаш направи брејк и поведе со 2:0 во гемови. Се одеше добро за Медведев, беше сигурен на свој сервис, притоа дозволувајќи му само една брејк шанса на Зверев која успешно ја одбрани и на крајот со 6:3 поведе со 1:0 во сетови.
За разлика од првиот сет, во вториот имаше вистинска борба и атомски тенис во режија на вториот и третиот тенисер на светот. Немаше брејк иако Медведев во три наврати се најде во позиција да го одзеде сервисот на противникот, но Зверев успеа да се одбрани за потоа во тај-брејкот да слави со 3:7 и да го израмни резултатот на 1:1 во сетови.
Во слична игра помина и третиот сет, се играше поен за поен се до новиот тај-брејк во кој сега поуспешен беше Русинот. Медведев направи четири мини брејка и на крајот славеше со 8:6 за конечен триумф од 2:1 во сетови.