Иако по првиот натпревар Леванте имаше активен резултат 1:1 против Атлетик Билбао, на крајот не успеа да обезбеди финале во Кралскиот куп.

Вечерва на реванш средбата во Валенсија исто така после регуларните 90 минути беше 1:1, а вториот полуфиналист во натпреварувањето го дознавме по двете продолженија.

Мечот одлично започна за домаќините со водство од 17 минута преку Рожер после асистенцијата на Рочина. Израмнувањето дојде после половина час игра кога сигурен од белата точка беше Гарсија.

Athletic Bilbao will play two #CopadelRey finals in just 14 days time

2020 final v Real Sociedad on Apr 3

2021 final v Barcelona on Apr 17

Opportunity for two cup trophies in two weeks. Incredible

— Justin Wasik (@just_wasik) March 4, 2021

Македонскиот репрезентативец Енис Барди го одигра целото второ полувреме и додатните 30 минути. Клучниот момент се случи во второто продолжение, поточно во 112 минута кога Беренгер шутираше, а топката заврши во мрежата откако удри во еден од дефанзивците и така го измами голманот за голема радост на Атлетик Билбао.

Така, играчите на тренерот Марселино за период од две недели имаат шанса двапати да го освојат трофејот во Кралскиот куп.

На 3 април во Севиља ќе игра во финалето (за минатата сезона 2019/2020) против Реал Сосиедад, а на 20 април (тековна сезона 2020/21) на истиот терен ќе се соочи во завршната битка против Барселона која вчера ја елиминираше екипата на Севиља.