Според политикологот и историчар Благојче Атанасоски, Македонија и Бугарија треба искрено да работат и да се расветлат некои историски настани, со цел да се гради пријателство во иднина.

– Ноторен факт е дека нашата историографија после 1945 година ги бираше фактите, историските настани и дела, како нам ни одговараше за изградба на новата, млада македонска политичка нација и многу историски настани и личности биле маргинализирани или пак врз нив се нема фрлено објективната историска светлина. Примерот со „Крвавото Коледе“ е еклатантен пример на „забранета историја“ кај нас, односно историски настан кој многу малку или воопшто не се третира, а има многу замрсени тези. Една од тие тези е дека се убиени 20.000-30.000 етнички македонски Бугари, како што го третираат ова прашање. Вистината е дека е ликвидирана македонската интелигенција, како Димитар Чкатров, Димитар Ѓузелов, Спиро Китанчев, кои во периодот на бугарската окупација 1941-1944 (администрација) кај нас, биле и заземале високи раководни позиции, бидејќи реално себеси се сметале за етнички македонски Бугари. Зошто тоа нашите експонирани историчари воопшто го кријат и не и го објаснуваат на нашата јавност, за малку да бидат појасни работите и да видиме од каде доаѓа и потекнува таа бугарска наглост и агресија во која тие нѐ обвинуваат дека ги лажираме, извртуваме и фалсификуваме историските факти и настани – вели Атанасоски за „Слободен печат“.

Тој додава дека од друга страна, Бугарија од нејзиното создавање води и губи војни за територијата на Македонија.

– Бугарското општество, политичките елити, медиуми и целата бугарска конјуктура влече невидени историски фрустрации и национални комплекси кон македонското прашање кое е романтизиран, но трагичен и траорен дел од нивниот современ национален историски мит и бит. Тие се опседнати со темата за Македонија, но и навредени што ние чувствуваме антагонизам кон нив, а имаме положителни мисли кон Србите, кои пак за нив се најголеми историски душмани. Тоа се гледа и во изјавите на Захариева, Каракачанов, Џамбаски и Ковачев, како јастреби на најжестоката бугарска политика кон нас – вели Атанасовски.

Според него, излезот може да се бара во децениско градење на довербата.

– Потребен е искрен пристап од двете страни, без провокаторски и омаловажувачки ставови од нивна страна кон нас, со кои ќе дозираат постојано вжештување и иритирање на македонскиот народ – вели Атанасоски.

Деновиве шефовите на дипломатиите на двете земји, Бујар Османи и Екатерина Захариева нагласија дека Македонија и Бугарија треба да ги оладат емоциите за да се врати довербата и да се промени перцепцијата на проблемот. Скопје и Софија се согласни дека со смирени чувства после парламентарните избори во Бугарија ќе има услови за политички исчекор, но засега не е јасно во која насока, судејќи според последната изјава на Османи дека „Бугарија не го спори македонскиот идентитет, туку историските основи за тој идентитет“, како и потенцирањето на Захариева дека тие не отстапуваат од Рамковната позиција што едногласно е усвоена во бугарскиот парламент и според која, меѓудругото, Македонците се вештачка творба создадена од Тито, практично, прелажани Бугари. Бугарија постојано ја обвинува Македонија дека ја лажира историјата и одбива да се соочи со сопственото искривување на минатото.