Британскиот премиер во заминување, Борис Џонсон вчера за последен пат се обрати пред парламентот како лидер на земјата. Испратен со аплауз од пратениците, Џонсон во „негов стил“ својот говор го заврши со познатата изрека од филмот „Терминатор 2“ на Арнолд Шварценегер, „Аста ла виста, бејби“.

Џонсон претходно овој месец беше принуден да ја поднесе својата оставка, откако притисокот врз него поради серијата скандали го достигна својот врв.

WATCH: Johnson ends his last PMQs with "Hasta la vista, baby" and receives a standing ovation. https://t.co/HenxjeczT7 pic.twitter.com/i2suozMscL

— TLDR News UK (@TLDRNewsUK) July 20, 2022

Говорејќи на својот последен настап на „Прашања до премиерот“, средба која секоја недела се одржува во парламентот, каде речиси секој пат ситуацијата ескалира и се води жестока дебата за работата на власта, Џонсон во кратки црти ги раскажа работите кои неговата Влада ги заврши за време на мандатот.

„Ние помогнавме, јас помогнав, оваа земја да се справи со пандемијата и ја спасивме Британија од варварството. Искрено, мислам дека ова е доволно за крај. Мисијата во главно е успешна“ изјави Џонсон.

Говорот тој го заврши со: „Сакам да им се заблагодарам на сите присутни и аста ла виста, бејби!“.

Иронијата на британските пратеници

Многумина од оние кои вчера му аплаудираа на Џонсон во парламентот, се токму истите кои всушност го принудија да поднесе оставка.

Истите тие пратеници, пред две недели го критикуваа неговото владеење и бараа негова оставка. Некои од неговите најблиски луѓе во кабинетот поднесоа оставки, а дел од нив сега се во трка за да седнат во неговата фотелја.

Но, не уживале баш сите пратеници во последниот говор на Џонсон.

Како што пишува „Ројтерс“, претходникот на Борис, Тереза Меј била меѓу оние кои не аплаудиралe.

Пратениците од опозицијата исто така не изразиле поддршка за британскиот премиер во заминување. За време на дебатата тие во неколку наврати го критикуваа Џонсон за неговите политики за време на владеењето.

Опозицискиот лидер, Кир Стармер, кој вели дека „едвај ги чека изборите во 2024 година“, синоќа воопшто не се срамеше да ги нареди сите неуспеси на Владата на Џонсон.

„Тој одлучи да излезе од неговиот златен бункер за последен пат за да ни каже дека сè е под контрола. Ќе ми недостасува неговата заблуда.“ вели Стармер.

Тесна трка за наследник на Џонсон

Конзервативците се подготвени за тесна трка меѓу поранешниот министер за финансии во Владата на Џонсон, Риши Сунак и министерката за надворешни работи Лиз Трас, кои веќе влегоа во шест-неделната битка за следен британски премиер, пишува „Гардијан“.

Според „Политико“ најверојатно еден од овие два кандидати ќе биде следен британски премиер.

Третиот учесник во трката, Пени Мордонт, според анкетите е зад Сунак и Трас, но нејзините поддржувачи велат дека не треба да се потценува нејзината улога.

По елиминацискиот круг во вторникот, Сунак доби 118 гласа од конзервативните пратеници, Мордонт доби 92, а Трас 86.

Иако таа постојаното се наоѓа на третото место на досегашните гласања, Трас ја фаворизираат и аналитичарите и букмејкерите. Следната елиминациска рунда се очекува како директна пресметка помеѓу Мордонт и Трас кој од нив ќе остане во „финалето“ и ќе се соочи против Сунак.

Крајниот рок за Ториевците да ги дадат своите гласови е 2 септември, а победникот ќе биде прогласен на 5 септември. Џонсон официјално ќе се повлече од функцијата на 6 септември.