Фудбалската репрезентација на Македонија денеска ги започна подготовките за финалниот бараж натпревар за пласман на Мундијалот во Катар против Португалија, а Стефан Ашковски најавува ново изненадување.

Македонија завчера во Палермо со голот на Александар Трајковски го совлада актуелниот европски шампион и во вторник ја очекува дуел со Португалија која ќе биде предводена од Кристијано Роналдо.

Ашковски кој одигра триесетина минути во Палермо, смета дека главниот адут на Португалците е индивидуалниот квалитет, но во фудбалот победува фудбалот.

– Емоциите стивнуваат полека, следува Португалија и ќе дадеме сѐ од себе за да ја израдуваме цела Македонија, нормално самите себе, но и да покажеме колку можеме. Убеден сум дека можеме многу. Не сакам да зборувам за квалитетот, сите знаат која е Португалија која според мене има сличен квалитет како Италија. Така да се надевам дека ќе одиграме уште подобро од тоа што одигравме со Италија. Португалија има добри индивидуалци, но во фудбалот поважен е тимот. И Италија има одлични индивидуалци, но видовме дека како тим не беа така сплотени – изјави Ашковски.