Артур Мело се враќа во Барселона, за да го раскине договорот
Бразилецот викендов ќе пристигне во Барселона за да се обиде да го раскине договорот со каталонскиот клуб кој покрена дисциплинска постапка против фудбалерот кој одби да игра во Лигата на шампионите.
Артур Мело иако пристигна како голема надеж и беше сметан за наследник на Чави Ернандез, не се наигра на „Камп Ноу“, посебно откако на клупата седна Кике Сетиен. Бразилецот сакаше да остане во Барселона, пред се поради желбата да игра заедно со Лионел Меси, но клубот се откажа од него и го испрати во Јувентус во замена за Миралем Пјаниќ.
Тој потег го налути Артур кој одби да игра за Барселона во Лигата на шампионите и не се врати на тренинзите на екипата поради што беше покрената дисциплинска постапка.
Инаку, Бразилецот по завршувањето на сезоната замина на одмор на Ибица, а потоа и во татковината иако Барселона му се закани доколку не се појави во тренинг центарот.
Артур смета дека челниците на Барселона лошо се однесуваа кон него бидејќи се откажаа од неговите услуги поради парите, а не од спортски причини.
Бразилецот одлучи викендов да допатува во Барселона на преговори со управата и да раскине договорот.