„Артконект“ ја објави збирката раскази „Начин на љубење“ од Валтер Уго Мае

Збирката раскази „Начин на љубење“ од Валтер Уго Мае е книга во која фантазијата и реалноста се преплетени и не можат да постојат една без друга. Книгата на Валтер Уго Мае на читателот му нуди незаборавно патување низ детскиот светолед: во него се ставаат под прашање најтврдокорните ставови и сигурности, со безусловна предаденост на желбата за откривање и зачуденоста, дозволувајќи ѝ на имагинацијата широко да ги отвори портите на љубовта.

Поради универзалните пораки што ги носат, расказите од „Начин на љубење“ се соодветни и за млади и за возрасни читатели. Валтер Уго Мае во својот поговор во книгата вели: „Несмасен сум. Приказните што ги измислувам се храбри да станат едно или друго нешто. Јас сум романтичен и сакам да го подобрам светот.“

Валтер Уго Мае е португалски писател, музичар и уметник. За своите дела има добиено високи книжевни признанија во Португалија, меѓу кои и наградите „Жозе Сарамаго“ и „Океанос“. Живее и работи во Порто. „Начин на љубење“ е збирка раскази издадена како дел од проектот „Европски приказни на надеж“ на издавачката куќа „Артконект“, поддржан од „Креативна Европа“ на Европската Унија. Преводот е на Наташа Сарџоска. Илустрациите во македонското издание се на Белкис Аску Челеби.

(Текстот е објавен во „Културен печат“ број 108, во печатеното издание на весникот „Слободен печат“ на 4-5 декември 2021)

Видео на денот