Арсовски: Подобро каква било политичка, од техничка влада во Бугарија
Според аналитичарот Петар Арсовски за Македонија е подобро во Бугарија да се состави политичка влада со што е можно повеќе коалициски партнери, наместо да се оди на нови парламентарни избори. Експертската влада, вели тој, би требала да организира избори наесен и ќе има изговор воопшто да не се занимава со односите Софија-Скопје, а во таква варијанта оваа година ќе биде целосно изгубена за македонските евроинтеграции.
– За нас е најдобро да се формира политичка влада со повеќе учесници затоа што така ќе биде полесно да се сподели одговорноста за одлуките што ќе се донесат – вели Арсовски за „Слободен печат“.
Во врска со тоа дали новиот парламентарен состав во Бугарија ќе биде ограничен од декларацијата со која се негира македонскиот идентитет и историја што во 2018 година едногласно ја усвои претходниот парламент, Арсовски вели дека е добро тоа што во овој состав има нови партии кои немаат врска со таа декларација, „а таа не е ниту Устав, ниту закон“.
– Во овој момент е навистина тешко да се прогнозира кој би можел да состави влада и се отворени се многу опции. Актуелниот премиер Бојко Борисов иако има помали шанси, сепак не треба да се отпишува затоа што тој е вешт политичар. Неговата последна понуда со 10 пратеници да го подржи Трифонов да направи Влада покажува дека Борисов е се уште во игра – вели Арсовски.