Политичкиот аналитичар Петар Арсовски вечерва во „Топ тема“ на „Телма“ се осврна на политичките случувања во Србија и на најавите за големи протестни собири за утре. Арсовски вели дека постои сериозен ризик од инциденти меѓу демонстрантите и приврзаниците на власта во сабота, но и дека политичката кариера на Александар Вучиќ најверојатно е завршена.

„Ризикот за инциденти утре во Белград е доста зголемен. Студентските протести во Србија досега беа аверзни на насилство и според мене, тоа беше еден од нивните најголеми адути. Целите протести и нивната ескалација во основа упатуваат на тоа дека политичката кариера на Вучиќ најверојатно е завршена“, рече Арсовски.

Илјадници студенти со месеци ги блокираат факултетите во Србија и одржуваат масовни протести ширум земјата, на кои им се приклучија голем број граѓани. Тие бараат одговорност кај властите за трагедијата со падот на настрешницата на железничката станица во Нови Сад во ноември, како и за почитување на законите и правната држава.