Арсовска: Скопјани немаат време за чекање уште четири години за некој да се сети на нив

Данела Арсовска/ Фото: МИА

Независниот кандидат за градоначалник на Град Скопје Данела Арсовска вечерва ги посети жителите од скопско Шуто Оризари пред кои ја презентираше својата програма за модерно Скопје.

-Недозволиво е во 21 век општина којашто се наоѓа во главниот град да има неасфалтирани улици, луѓето да газат по кал, без водоводна и канализациска мрежа. Нема тротоари и улиците не се безбедни ниту за возрасните, а уште помалку пак за децата. Едноставно, ова се проблеми кои треба да бидат оставени во минатиот век. И граѓаните со кои секојдневно се среќавам не бараат многу. Бараат нормални услови за пристоен живот како што заслужува секој еден граѓанин. И должност на секој градоначалник е да го овозможи тоа, изјави Арсовска по средбата со жителите од Шуто Оризари.

Таа вети дека уште од првиот ден по изборите ќе се зафати со решавање на овие, како што рече, суштински проблеми.

Скопје и скопјани немаат време за чекање уште четири години за некој да се сети на нив. Со брзи и ефикасни решенија Скопје ќе биде метропола како што секој од нас посакува и заслужува да живее во неа, рече Арсовска.

Извор: МИА

Видео на денот