ФОТО | Арсовска: Недозволиво е во 21 век жената да биде помалку вреднувана од мажот

Данела Арсовска
Данела Арсовска / Фото: Фејсбук, Данела Арсовска

Независната кандидатка за градоначалник на Град Скопје, Данела Арсовска, денеска беше дел од дебатата за социјално и економско зајакнување на жените преку социјални претпријатија што се одржа во Штип. Со дебатата беше означен и почетокот на петтата „Текстилијада“ чие годинешно мото е „Известување и улогите во борбата за работнички права“, а манифестацијата ја организира невладината „Гласен текстилец“ од Штип.

Арсовска посочи дека дебатата отвора нови можности за да се понудат решенија кои ќе креираат подобра иднина за економскиот просперитет на државата во целина. Во своето обраќање наведе дека во Македонија 99,8 проценти од регистрираните претпријатија се микро, мали и средни претпријатија и сите тие можат да се категоризираат во делот социјално претприемништво затоа што во моментов работат за да преживеат.

– Компонентата на социјално претприемништво верувам дека ќе отвори нови перспективи. Долго време се соочувавме со проблеми со регулативата, имаше и проблеми да се разбере што претставува всушност социјално претприемништво и како ние можеме да го подобриме, поточно како може едно претпријатие да работи користејќи претприемачки принципи, а воедно служејќи на заедницата. Самиот концепт е чуден за една држава во која што 40 отсто од населението живее во сиромаштија, каде луѓето работат за да преживеат, што особено се интензивираше во период на пандемија. Затоа е важно да се успее со поддршка на претприемништвото, да ги охрабриме граѓаните да вложуваат во иновативни идеи и да градат подобра иднина за себе и за околината, рече Арсовска.

Данела Арсовска
Фото: Фејсбук, Данела Арсовска

Во вториот дел од обраќањето, Данела Арсовска се осврна на правата на жената работничка, што всушност беше и тема на дебатата и истакна дека е голем поборник на движењето за родова еднаквост, затоа што, како што кажа таа, недопустливо е во 21. век за еднаква работа и вложен труд на работното место, жената да биде помалку вреднувана во однос на мажот.

– Во моментов, статистиките покажуваат дека жената е дури за 20 проценти помалку платена на пазарот на трудот. За застапеност на жените во политиката кај нас постои загарантирана квота, но во приватниот сектор таква регулатива нема. Затоа, сите ние, заеднички, мора да се избориме за жената го добие заслуженото место во општеството, заклучи Арсовска.

Арсовска посочи дека од Сојузот на стопански комори на Македонија, во кризата континуирано беше истакнувано дека од исклучителна важност е да не се дозволи луѓето да останат без работа поради последиците од ковид-кризата.

Извор: МИА

Ќе се подобрува бизнис климата за развој на женското претприемништво

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот