Арсовска го победи Шилегов со 28 илјади повеќе освоени гласови
Државната изборна комисија (ДИК) ги соопшти првичните неофицијални резултати од вториот круг од локалните избори, според кои Скопје и 43 општини во земјава добија градоначалници. Според објавените првични податоци, ВМРО-ДПМНЕ и коалицијата „За подобра Македонија“ во вториот круг од локалните избори освоија градоначалнички места во 20 општини, и тоа во Битола, Брвеница, Василево, Вевчани, Гевгелија, Демир Хисар, Зелениково, Конче, Кочани, Кратово, Лозово, Македонска Каменица, Македонски Брод, Ново Село, Пехчево, Охрид, Ранковце, Ресен, Чешиново-Облешево и Радовиш. Коалицијата „Најдоброто за мојата општина“, предводена од СДСМ, освои градоначалнички места во седум општини – Демир Капија, Пробиштип, Росоман, Старо Нагоричане, Чашка, Чучер-Сандево и Центар. Седум градоначалнички места во вториот круг освои и ДУИ, и тоа во Арачиново, Боговиње, Долнени, Кичево, Струга, Теарце и Чаир. Алијансата за Албанците и Алтернатива ќе има градоначалници во Врапчиште и Гостивар, а БЕСА во Желино и Тетово. ГРОМ победи во Карпош, ДПА во Студеничани, а коалицијата на ЛДП-ДОМ – во Шуто Оризари. Независни кандидати победија во Дебрца, Куманово и Скопје.
Сега веќе поранешниот градоначалник на Скопје, Петре Шилегов, победи само во три општини, Центар, Сарај и Чаир. Скопје за првпат ќе има жена-градоначалник, откако независната кандидатка Данела Арсовска, која беше поддржана од опозициската коалиција, победи со 28.083 повеќе освоени гласови од Шилегов. Таа освои 118.749, а Шилегов 90.672 гласа.
Претседателот на ДИК Александар Даштевски изборите ги оцени како успешни, на кои за првпат беа употребени уреди за отпечаток од прст.
– Вториот круг помина речиси 100 проценти успешно и понатаму очекуваме усовршување на овој процес. Беше битно да се почне, секогаш има детски болести, меѓутоа ако не почнеме, ќе може да заостанеме во целокупниот развој, а се работи за прилично важна категорија за развој на демократијата – изјави Даштевски.