Арсенал ќе стане шампион на Англија со 95 бода, вели суперкомпјутерот
Ретко кој пред почетокот на сезоната очекуваше Арсенал да биде конкурентен за титулата во Премиер лигата, но „топџиите“ во овој момент се лидери во најсилната англиска конкуренција и на добар пат по долго време да слават титула.
На десет кола пред крајот на сезоната Арсенал има осум бодови повеќе од Манчестер Сити, но и натпревар повеќе од „граѓаните“. Познати се пресметките на суперкомпјутерот за тоа кој ќе биде нов шампион, па според најновата пресметка на Островот, „топџиите“ ќе ја задржат предноста.
Во пресметката биле земени аналитички податоци како очекувања за постигнати голови и асистенции, а по 100.000 симулации резултот бил дека Арсенал ќе освои 95 бода и за пет бодови ќе биде пред Манчестер Сити.
Не се очекува никаква драматична завршница, барем според ваквите пресметки. Ако Арсенал стигне до титулата, тоа за овој тим ќе биде вкупно 14-та, а прва уште од 2004 година.
Во топ четири би завршиле уште Манчестер Јунајтед со 74 бодови и Тотенхем со 69, Ливерпул како петти со 66 бодови би обезбедил место во Лига Европа, а Њукасл и Брајтон со по 65 бода на шестата и седмата позиција би ги пополниле местата кои водат во Конференциската лига.
Кога е долниот дел во прашање од лигата испаѓаат Саутемптон како последен, Евертон како 19-ти и Нотингем како 18-ти.