Арбен Таравари е избран за редовен професор на Медицинскиот факултет на УКИМ
Специјалистот-невролог и гостиварски градоначалник, Арбен Таравари е избран за редовен професор по Неврологија на Медицинскиот факултет на универзитетот „Св. Кирил и Методиј“, објави УКИМ во универзитетскиот билтен.
Таравари, кој има долгогодишно искуство на Универзитетската клиника за неврологија, досега имаше звање вонреден професор.
Врз основа на целокупната доставена документација и личното познавање на кандидатот, Рецензентската комисија позитивно ја вреднува и ја оценува наставнообразовната, научноистражувачката и стручно-применувачката дејност, како и дејноста од поширок интерес на вонр. проф. д-р Арбен Таравари. Врз основа на изнесените податоци за севкупната активност на кандидатот од изборот во претходното звање до денес, Комисијата заклучи дека вонр. проф. д-р Арбен Таравари поседува научни и стручни квалитети и според Законот за високото образование и Правилникот за посебните услови и постапката за избор во наставно-научни, научни, наставно-стручни и соработнички звања и демонстратори на Универзитетот „Св. Кирил и Методиј“ во Скопје, ги исполнува сите услови да биде избран во звањето редовен професор во наставно-научната област неврологија“, се вели во рефератот за изборот на Таравари во универзитетскиот билтен.
Актуелниот градоначалник на Гостивар и поранешен министер за здравство минатиот месец најави повлекување од функцијата генерален секретар на Алијанса за Албанците, како и дека градоначалничкиот мандат кој го освои на локалните избори есенва, ќе биде негов последен.