Aпелација ја намали затворската казна за Ѓоко Поповски
Затворската казна на поранешниот помошник министер за јавни набавки во МВР, Ѓоко Пoповски е намалена од девет на пет години. Одлуката ја донеле апелациските судии кон крајот на минатата недела.
Oва е втор пат Апелација да одлучува за случајот „Триста”. Првиот пат во 2018-та година ја укина поради пропусти во постапката и ја врати на повторно судење.
Првостепената пресуда и првиот (22 мај 2018) и вториот пат(22 октомври 2019), од девет години затвор во Кривичен суд ја донесе судијката Добрила Кацарска, која наскоро треба да стане уставна судијка.
Ѓоко Поповски е првиот функционер кој заврши во затвор.
Случајот „Триста“ на Специјалното јавно обвинителство (СЈО) се однесуваше на набавка на 300 возила за потребите на МВР. Според обвинението, со оваа набавка буџетот бил оштетен за 453.570 евра.