Стотици руски државјани доаѓаат во Србија во изминатите недели за да добијата вакцини против ковид одобрени од Запад, бидејќи меѓународните здравствени власти се уште не ја одобриле руската вакцина Спутник В, пишува денеска агенцијата АП.

Според АП Србија, која не е членка на ЕУ, за Русите е погоден избор да се вакцинираат затоа што можат да влезат во оваа балканска земјабез визи и затоа што нуди широк избор на вакцини од западно производство.

Организираните патувања на Русите се во пораст и Русите можат да бидат забележани во главниот град Белград во хотели, ресторани, барови и клиники за вакцинација.

„Ја примивме вакцината Фајзер затоа што сакаме да патуваме низ целиот свет“, рече 54 -годишната Надежда Павлова, откако ја прими вакцината минатиот викенд во големиот центар за вакцинација во Белград.

Тури за вакцинација за Русите кои сакаат да добијат вакцини одобрени од Светската здравствена организација, се појавија на пазарот во средината на септември, велат од Руската асоцијација на тур-оператори за АП.

Извршниот директор на организацијата вели дека цените се движат од 300 до 700 долари, во зависност од тоа што е вклучено.

АП потсетува дека руската вакцина Спутник В беше пофалена како прва регистрирана вакцина против коронавирус и се појави во август 2020 година и беше одобрена во околу 70 земји, вклучувајќи ја и Србија. Меѓутоа, Светската здравствена организација соопшти дека процесот на преглед е се уште во тек, а причините за одложување на одобрувањето се поврзани со производствените капацитети.

Вчера, претставник на СЗО рече дека правните прашања што го попречуваат разгледувањето на Спутник В се пред решавање, што би можело да го рестартира процесот за давање одобрение за итна употреба на таа вакцина.

Други пречки за одобрување на руската вакцина вклучуваат недостаток на целосни научни информации и инспекции на производствените места, рече помошникот генерален директор на СЗО Маријанџела Симао.

„Спутник В“ исто така чека одобрување од Европската агенција за лекови пред да бидат укинати ограничувањата за патување за лица вакцинирани со овој производ.

Тоа долго чекање фрустрираше многу Руси, па кога СЗО објави ново одложување во септември, тие почнаа да бараат решенија на друго место.

„Луѓето не сакаат да чекаат, им треба можност да заминат во Европа од различни лични причини“, изјави Ана Филатовска, портпарол на туристичката агенција „Руски експрес“ во Москва.

Србија, потсетува АП, е исто така православна и словенска земја која нуди вакцина „Фајзер“, „АстраЗенека“ и кинеска „Синофарм“. Поради побарувачката на руската туристичка агенција, тие сега нудат и патувања во Хрватска каде што туристите можат да ја добијат вакцината „Џонсон и Џонсон“, која се дава само во една доза, и за која не мора да се враќаат за втора доза.

“Побарувачката за Србија расте како лавина. Се чини дека нашата компанија овие денови продава само тури за Србија”, рече Филатовска.

Србија ја воведе можноста за вакцинација на странци во август, кога вакцинацијата во земјата забави и достигна околу 50 проценти од возрасната популација. Според претходните податоци на српската влада, речиси 160.000 странски државјани се вакцинирани во земјата, но не е познато колку од нив се Руси.

Откако турите за вакцинација станаа толку популарни пред околу еден месец, тие се добредојдени за тур -операторите во Србија погодени од пандемијата и веќе слабата економија.

Сопственикот на туристичката агенција БТС Компас во Белград, Предраг Тешиќ, изјави дека биле резервирани однапред. Тој рече дека започна скромно на почетокот, но дека бројките убаво растат од ден на ден.

Тој рече дека неговата агенција организира се, од превоз од аеродром до сместување, превод и помош на местата за вакцинација. Кога ќе се вратат за втората доза за три недели, на гостите им се нудат и обиколки на некои популарни локации во Србија.