Македонската А репрезентација загуби минимално во Скопје од Бугарија со 0:1 во рамките од Ц сегментот во Лигата на нации.

Пред почетокот на натпреварот на Националната арена „Тодор Проески“ од почеток до крај беше исвиркувана химната на Бугарија.

По натпреварот бугарскиот репрезентативец Валентин Антов вели дека таквото исвиркување ја мотивирало неговата репрезентација во текот на мечот.

– Расположението е одлично. Цела Бугарија може да биде среќна што победивме на овој натпревар. Заслужуваме малку да се насмееме и да бидеме среќни. Ја сменивме шемата, имаме добар тим и добро разбирање помеѓу нас. Денеска покажавме доволно за да ја зачуваме мрежата. Потребни ни се добри натпревари и победи. Секако ќе уживаме во оваа победа и ќе гледаме да се развиваме. Покажавме голема желба и се изолиравме од ситуацијата надвор. Тие ја исвиркаа нашата химна што нè мотивираше – рече Антов по завршувањето на натпреварот.

Бугарија со овие три бода го освои второто место на конечната табела во групата „4“.