Ансу Фати: Го живеам својот сон, играм со Меси
Младиот фудбалер на Барселона, Ансу Фати, брилјираше на стартот од сезоната постигнувајќи два гола во победата над Виљареал.
Иако сите очи беа вперени во Лионел Меси кој цело лето беше во отворена „војна“ со претседателот на тимот, Хосеп Марија Бартомеу, бидејќи не му беше дозволено да си замине од „Камп Ноу“, во убедливиот триумф од 4:0 над Виљареал блесна тинејџерот Ансу Фати.
Ла Лига: На теренот нема проблеми за Барселона, ја потопија „жолтата подморница“ (ВИДЕО)
По натпреварот, Фати кој немаше ниту две години кога Лионел Меси во 2004 година дебитираше за Барселона, изјави дека отсекогаш сакал да се угледа на својот идол.
– Играњето заедно со Меси за мене е сон. За вакво нешто сонував уште кога бев дете и сега го живеам сонот, играм со Меси – изјави 17-годишниот Фати.
Тинејџерот минатата сезона веќе успеа да му собори еден рекорд на Меси, стана најмлад стрелец во историјата на Барселона.
– Сакам да напредувам секој ден, да продолжам да учам од своите соиграчи бидејќи тие се најдобри на светот и секој ден ми помагаат да напредувам – додава Фати.
Пофални зборови за тинејџерот имаше и неговиот тренер Роналд Куман, кој откри дека бил малку разочаран од играта на Фати на пријателскиот натпревар против Елче, но дека бил одличен против Виљареал.
– Го критикував по натпреварот со Елче, но сека му реков дека одигра одлично. Беше конкретен и го искористи својот квалитет. Тој е млад фудбалер кој мора да игра постојано, а исто така покажа дека има голема иднина – изјави Куман.