Анемијата победете ја со цвекло
Независно од тоа за каков здравствен проблем станува збор, сокот добиен од варење или цедење на цвеклото, ќе ви помогне во подобрувањето на здравствената состојба
Редовното внесување цвекло во организмот позитивно влијае врз зајакнување на имунитетот, но и врз регенерирањето на сите органи.
Покрај тоа, многу помага и во детоксикација на телото како и на прочистувањето на крвта, го штити срцето и крвните садови, го чува мозокот, ја обновува цревната флора…
Сепак, иако нема човек што досега не слушнал или не прочитал за многуте здравствени придобивки што ги добива секој што редовно ја внесува оваа исклучително здрава намирница во телото, честопати ова растение се избегнува поради интензивната боја што ја остава на рацете, а која подоцна многу тешко се отстранува.
Сепак, и за тоа постои решение. Салатата од цвекло секогаш подготвувајте ја со ракавици, а најлесен начин да ги внесете сите хранливи состојки во организмот без притоа да направите неред во кујната и да ја обоите кожата е доколку си направите сок од цвекло.
Токму една чаша сок од цвекло на ден ќе биде сосема доволно за комплетно регенерирање на организмот.
Подобрете ја крвната слика
Анемијата знае да биде упорна, особено кај жените бидејќи менструалниот циклус помага во „исфрлање“ на значително количество крв од телото.
Избалансираната исхрана и внесот на минерали, витамини и други есенцијални нутритиенти е исклучително важна за нормално функционирање на телото. Анемијата носи многу негативни последици, a секој што е анемичен чувствува дека е исцрпен, нерасположен, изморен, има вртоглавица, намален крвен притисок, главоболка, отежнато дишење…
Токму за да се намалат овие симптоми, а крвта да се доведе до совршенство, потребно е да се пие сок од цвекло.
Зајакнете го имунитетот
Цвеклото исто така е богато со витамин Ц, како и витамини од групата Б и Е, поради што се вбројува во еден од најздравите плодови кога е имунитетот во прашање. Цвеклото врши детоксикација на целото тело, ги отстранува наталожените отрови и го зајакнува телото. Луѓето што редовно јадат цвекло и пијат сок направен од него, многу ретко страдаат од настинка и грип.