Стефан Андоновски, член на ИК на ВМРО-ДПМНЕ денеска на прес-конференција најави дека од утре ќе продолжат со протестите кои ќе почнат во 17 часот пред објектот на Министерството за надворешни работи во Скопје. 

– На седницата на Извршниот комитет кој се одржа вчера во Битола, донесена е одлука за продолжување на протестите за спречување на националниот срам кој и се подготвува на Македонија од страна на Зоран Заев и неговите соработници. Заев е таткото на спорот со Бугарија. Иако ја убедуваше македонската јавност дека со потпишувањето на спорниот договор повеќе немаме отворени прашања со соседите, очигледно е дека се отворија нови и досега неоспорувани теми. Република Македонија е блокирана. Протестите продолжуваат затоа што Заев и Бујар Османи кријат за што се преговара и што се’ се подготвени да прифатат од бугарската декларација. Го повикуваме министерот Османи да го покаже документот. Ако не се задира во македонскиот јазик, идентитет и историја, тогаш зошто Заев и Османи го кријат овој документ? Се додека на тајни преговори се подриваат македонските национални интереси, ВМРО-ДПМНЕ ќе продолжи да протестира заедно со граѓаните на Република Македонија. Протестите продолжуваат утре од 17 часот пред МНР во Скопје – рече Андоновски.

Тој се заблагодари на македонската јавност на трпеливоста во метежите на улиците и додаде дека „треба сите да разбереме дека ова е наша национална борба за спречување на разградувањето на македонската нација“.