Женската фудбалска репрезентација на САД чиј селектор е Македонецот Влатко Андоновски го освои третото место на олимпискиот турнир во Токио откако во мечот на бронзениот медал ја совлада Австралија со 4:3.

Репрезентацијата на САД која важеше за главен фаворит за златниот медал и во Токио пристигна како актуелен светски шампион загуби во полуфиналето од Канада со 1:0, но денеска Андоновски и неговите избранички се „извадија“ и дојдоа до медал.

Меган Рапино во осмата минута го отвори резултатот, но девет минути подоцна Австралија преку Кер дојде до израмнување. Сепак, до крајот на полувремето фудбалерките на САД постигнаа два гола преку Рапино и Карли Лојд за предност од 3:1. На стартот од вториот дел Лојд со својот втор гол ги реши дилемите околу победникот и освојувачот на бронзениот медал. До крајот на средбата Австралија единствено успеа да го ублажи поразот со головите на Форд и на Гиелник.
Во финалето кое ќе се игра утре ќе се сретнат Канада и Шведска.