Доколку некој ја искористи својата шанса, и со неполни 18 години, да биде прволигашки играч, тоа во оваа сезона го направи Андреј Андоновски.

Иако имаше понуди, како добар дел од своите репрезентативни соиграчи од генерацијата 2002, да замине и да заигра во некоја земја надвор од Македонија, високото крило се одлучи за онаа „домашна варијанта“.

Да биде дел од вториот тим на МЗТ Скопје Аеродром, кој се избори за шанса за настап во елитната македонска конкуренција, и во „премиерната“ прволигашка сезона да запише навистина добри бројки.

– Како младински репрезентативец на Македонија од свои 14 години, мој најголем сон од секогаш бил да сум дел од сениорскиот тим на репрезентацијата на Македонија. Доколку во блиска иднина добијам повик за учество во репрезентацијата, тоа ќе биде само потврда на моето секојдневно работење и усовршување. Сепак сеуште сум доста приземен во врска со ова прашање, и се трудам што помалку да размислувам на оваа тема. Но, доколку некогаш ја добијам честа да ги бранам националните бои во сениорска конкуренција, сигурен сум дека ќе го оставам срцето на терен како и до сега.

Бидејќи сум млад играч сите врати и опции сеуште ми се отворени. Досегашните понуди за странство не бев спремен да ги прифатам и задоволен сум од својата одлука. Во последната сезона одиграв добри натпревари во Првата лига, и мислам дека младите играчи како мене можат многу да напредуваат и во Македонија – се зборовите на Андоновски за официјалниот сајт на македонската кошаркарска федерација.