Косовскиот премиер Албин Курти ја информираше Европската комисија за чекорите што ги планира Приштина за укинување на таксата за увозот на српски производи на Косово, најавувајќи дека таа ќе биде укината на 15 март. Тоа значи, како што вели Курти, дека Приштина ја покажува дипломатска волја за обновување на дијалогот со Србија.

Во писмото, косовскиот премиер изразува очекување дека на овие дејствија Белград реципрочно ќе возврати, односно оти ќе ги отстрани сите бариери во трговијата, како и прекинување на кампањата за повлекување на признавањата на Косово. Претходно исто, Курти ги информираше и претставниците на САД, на кои им потенцираше дека очекува со укинувањето на таксата Србија да ги прекине непријателските дејствија кон Приштина.

Изјавата на Курти доаѓа само два дена откако тој се закануваше дека таксите нема да бидат целосно укинати, како и заканите за поведување на импичмент на претседателот Хашим Тачи, кој патем и ги договори овие дипломатски компромиси за Приштина да се врати на преговарачката маса.

Инаку, ова менување на ставот на Приштина доаѓа по жестокиот притисок на Вашингтон, кој пред два дена на состанок ги повика претседателот на Косово Тачи, и српскиот претседател Александар Вучиќ. Деталите од средбата не се познати, но познато е дека и Белград и Приштина се согласија да направат отстапки, нешто што изминатата година за нив не беше прифатливо.

Од друга страна, Белград и претседателот Вучиќ кратко изјавија дека таксите ќе бидат укинати, но дека наредниот период Србија ќе се најде под жесток меѓународен притисок. Иако не јавно, но најверојатно е договорено некакво признавање на независноста на Косово, кое иако засега не е потврдено од Вучиќ, најверојатно е како резултат на притисокот на Вашингтон конечно да се реши ова прашање, вели новинарот Дејан Андоновиќ за „Утрински брифинг“ на „Слободна ТВ“.

Вклучувањето на САД во операцијата наречена „враќање на преговарачка маса“ на Белград и Приштина дава резултати бидејќи влогот е голем. Во пресрет на претседателските избори, администрацијата на Трамп мора да го реши овој спор и така да добие политички поени на претстојните избори. Вашингтон во рок од еден месец успеја речиси од невозможна точка да договори железничка и авиолинија меѓу Белград и Приштина како и компромис на двете страни кој до вчера отфрлаа било какво попуштање на цврстите позиции.