Анализа на „Јуропиан Вестерн Балканс” за пописот во Македонија: Пребројте ги граѓаните, додека сè уште ги има

Фото: pinterest.co.uk

Додека Европа се подготвува за редовниот декаден циклус на попис на населението наредната година, Северна Македонија и Босна и Херцеговина се двете европски држави кои сè уште го немаат утврдено ниту датумот за попис, наведува „Јуропиан Вестрен Балканс (ЈВБ), потсетувајќи дека последниот попис во земјава е спроведен во 2002 година.

Порталот наведува дека од 2010 година само 21 земја во светот не споревеле попис на населението, од кои две се дел од Европа – Украина и Северна Македонија, додавајќи дека попишувањето во земјава беше запрено во 2011 година, „делумно поради политичките стравувања од неповолни бројки на етничката структура”.

– Според македонскиот Устав, јазичните права и соодветената застапеност се загарантирани за етничките заедници кои надминуваат 20 отсто од населението. Во 2002 година, етничките Албанци сочинуваа околу 25 отсто од двата милиона македонски граѓани. Се стравува дека следните резултати од пописот би можеле да ја отворат опасната Пандорина кутија, што претставува постојана пречка за одржување фер и точен попис на населението, оценуваат авторите на анализата.

ЈВБ посочува дека од демографски аспект, Северна Македонија е школски пример за спротивставени детерминанти за составот на населението – етничките Албанци имат поголем наталитет отколку етничките Македонци, но тие од друга страна многу повеќе емигрираат, па затоа е тешко да се процени кој фактор е поголем – прирастот или емиграцијата.

Според порталот, ако се и приближно точни проценките дека во последните две децении земјава ја напуштиле дури 600.000 лица, тогаш ќе се покаже дека емиграцијата веќе подолго период е појава карактеристична за сите етникуми, а не само за Албанците.

– Бројот на смртни случаи во Северна Македонија на национално ниво во 2019 година го надмина бројот на новородените, што е прв таков случај од независноста (и веројатно во историјата) на земјата. Оваа пресвртница најмногу се должи на драматичниот пад на бројот на новородени во речиси сите општини каде Албанците се мнозинство, имајќи предвид дека наталитетот меѓу Македонците во голема мера го задржа своето претходно (ниско) ниво, додава ЈВБ.

Според авторите на анализата, со ваквите етно-демографски трендови остануваат крајно тешко да се предвиди етничкиот состав на населението во земјата, што нема спроведно попис во последните 20 години.

Тие проценуваат дека се можни две решенија за „загатката со пописот” во земјава.

– Првото и можеби оптимално, но, сепак, помалку веројатно решение, е пописот да се одржи што поскоро, без никакви политички интервенции и со силен надзор на меѓународната заедница. Дури и ако бројот на етничките Албанци се покаже помал од 20 проценти, краткорочните последици по правата на албанската заедница ќе бидат занемарливи. Како и другите многу помали малцинства, како што се Турците, и Албанците би го задржале правото на основно, на средно, па дури и на високо образование на нивниот мајчин јазик. Квотите за јавна администрација ќе бидат укинати, но етничката рамнотежа меѓу вработените веројатно нема да се промени, бидејќи меѓународната заедница не би толерирала масовни отпуштања на вработени Албанци, ако има обиди за нешто такво, се наведува во текстот.

Од друга страна, сметаат авторите, обезбедено е учество на албанскиот фактор во извршната власт, бидејќи пропорционалниот изборен модел гарантира вклучување во владата на најмалку една партија на етничките Албанци, освен ако двете најголеми македонски партии не решат еден ден да формираат голема коалиција, што во моментов тешко дека може да се замисли.

– Изборите во 2016 година поттикнаа надеж дека гласањето по етничка линија може да се промени, откако владејачкиот Социјалдемократскиот сојуз на Македонија одзеде десетици илјади гласови од партиите на етничките Албанци, но на изборите оваа година ДУИ успеа да ги врати повеќето од овие гласови, додава „Јуропиан Вестерн Балкан”.

Второто и, според авторите на анализата, сè поизвесно решение, би било од пописот целосно да се изостави прашањето за изјаснување по етничка припадност.

– Очигледен поттик за прифаќање на ваквото решение ќе биде избегнување на уште еден круг на политички договори и одржување на оваа клучна статистичка операција што е можно поскоро, се наведува во текстот.

Според ЕВБ, изоставувањето на прашњето за етничката припадност не е невообичаено во пописите во светот, но тоа „би го овековечило пописот од 2002 година како траен показател за етничкиот состав на земјата”.

– На прв поглед, со ова ќе се задржи политичкиот статус-кво и ќе бидат избегнати тензии во општеството на краток рок. Сепак, тоа, исто така, ќе го засили популарното тврдење во антиалбанските кругови дека Алабанците никогаш не биле над 20 проценти. Така одењето на линија на помал отпор и изоставувањето на прашањето за етничката припадност може да го поткопа кревкиот етнички соживот, се додава во анализата.

ЈВБ оценува дека најголем предизвик ќе биде враќањето на демографијата од доменот на „големата политика” во нејзиното природно подрачје на „мали политики” во различни области како што се образованието, транспортот и здравствената заштита.

– На крајот на краиштата, овој проблем има извонредно едноставно решение. Најдобар начин е да се престане да се манипулира со односите по етничка припадност и да се започне со пребројување на граѓаните, додека се уште ги има за броење, се заклучува во анализата.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот