Американски медиуми: Стигнува руското оружје од кое нема одбрана
Рускиот систем за контрола на мали беспилотни летала за масовен напад „Јато 93“ претставува сериозна закана за потенцијалниот противник, пишува американскиот магазин „Popular Mechanics“
Новиот концепт ќе овозможи за време на нападите да се употребат повеќе од стотина дронови, а секој од нив ќе биде во можност да носи експлозивна направа, нагласува авторот Кајл Мизоками. Тој проценува дека ќе биде многу тешко да се обие удар на таква сила.
– Огромните јата на руски беспилотни летала нема да биде лесно да се запрат – пишуваат од магазинот.
Во текстот се наведува дека беспилотните летала, кои се направени по принципот на „летачко крило“, ќе можат да се дигнат во воздух и да дојдат во вертикална положба. Ќе можат и да носат товар од два и пол килограми. Мизоками истакнува дека вообичаените одбранбени средства – ракети, дронови, топови и автоматски пушки – не се доволно добри потполно да го неутрализираат „Јато 93“.
– Обранбениот систем кој е во состојба да сруши 90 отсто од дроновите има многу добри перформанси, но сепак пропушта 10 отсто од беспилотните летала – стои во текстот.
Според мислењето на авторот, најдобро средство во борбата против беспилотните летала може да станат „блокаторите на сигнал“, но тие не влијаат на автономните беспилотни летала, бидејчи тие не примаат радио-сигнали. Според авторот на текстот, рускиот систем „Јато 93“ ќе биде проблем за сите противници на Москва, кога ќе започне да се употребува во пракса.
„Јато 93“ е развиен од Воениот научен центар на Военото воздухопловство на Русија, а системот е претставен на форумот „Армија 2019“. Во зависност од задачата, бројот на летала може да се зголемува по потреба.