Американски и француски дипломати во Москва по детали од договорот за Нагорно Карабах
Дипломати на САД и Франција утре ќе пристигнат во Москва за да се запознаат со детали од договорот за Нагорно-Карабах, јави денеска руското МНР.
Како гаранти на овој договор, Русија и Турција досега не испратија конкретни детали околу тоа во што се состои самиот договор за прекин на огнот. САД и Франција претходно побараа да бидат директно брифирани во врска со деталите. Французите сметаат дека има неопределености околу условите за прекин на огнот.
Во одговор на ова, рускиот министер за надворешни работи, Сергеј Лавров, изјави дека му било чудно да слушне такви изјави од САД, бидејќи деталите околу договорот веќе биле испратени по дипломатски канали.
Во врска со барањето на Франција, тој истакна дека во изминатите десет денови претседателите на Русија и на Франција двапати „најдетално“ разговарале на оваа тема.
Рускиот претседател Владимир Путин денеска изјави дека Американците и Французите „не треба да ги дуваат усните” затоа што договорот бил склучен без нив. Тој високо ја оцени нивната заинтересираност и учество во претходните напори за изнаоѓање решение.
Путин истакна дека се работи за судбината на милиони луѓе. А минатата недела тој откри дека во воениот конфликт за територијалниот спор околу Карабах меѓу Ерменија и Азеребејџан, што започна во септември, загинале вкупно околу 4.000 лица.