Американска атлетичарка падна на допинг тест поради – бурито
Американката Шелби Хулихан е суспендирана на четири години бидејќи била позитивна на допинг контролата, а како причина за позитивниот тест наведе дека е поради бурито од свинско месо.
Американската атлетичарка на новинарите им изјави дека во јануари годинава била известена дека на допинг тестот била позитивна на анаболичкиот стероид нандролон.
Според Хулихан, причината за позитивниот тест најверојатно е тоа што вечерта пред тестирањето јадела бурито од свинско месо.
Одделението за интергритет во атлетиката соопшти дека одлуката за четиригодишната суспензија ја поддржа и Судот за спортска арбитража, а суспензијата стапи на сила на 14 јануари годинава.
„Сакам да бидам јасна, никогаш не сум земала супстанци кои ги зголемуваат перформансите. Тогаш дознав дека ВАДА има сознанија оти конзумирањето на свинско месо може да предизвика лажно позитивен тест на нандролон бидејќи. Свинските изнутрици имаат најголемо ниво на надролон“, напиша Хулихан на социјалните мрежи.
Атлетичарката потенцира дека пет дена откако била известена за позитивниот тест, направила список на намирници кои ги конзумирала пред тестирањето.
„Донесовме заклучок дека причина за позитивниот тест е буритото кои го купив и го изедов 10 часа пред допинг тестот. Буритото е купено во автентичен камион кој продава мексиканска храна и кој се наоѓа во близина на мојот дом во Бивертон. За тоа ја известив единицата за интегритет во атлетиката и верувам дека тоа е изворот за позитивниот допинг тест. Направив се што можев за да ја докажам мојата невиност, поминав дури и тест на полиграф, дадов примерок од косата на една од најреномираните лаборатории“, додава Хулухан.
Сепак, рекордерката на САД на 1.500 и 5.000 метри, нема да учествува на Олимписките игри во Токио како и на Игрите во Париз кои треба да се одржат во 2024 година.