Американското Министерство за финансии денеска воведе санкции против поранешниот претседател на Парагвај, Орасио Картес, и актуелниот потпретседател Уго Веласкез поради „широко распространета корупција што ги поткопува демократските институции“.

Санкциите се воведени за четири ентитети во сопственост или управувани од Картес, кој е обвинет за коруптивни активности пред, за време и по неговиот мандат како претседател. Санкциите значат дека целиот имот на Картес и Веласкез во САД е запленет и замрзнат.

Картес е лидер на владејачката партија Колорадо и е клучен поддржувач на кандидатот на овогодишните претседателски избори.

Според американското Министерство за финансии, Картес се приклучил на партијата Колорадо во 2009 година, обезбедувајќи финансиска помош и други стимулации за да ја наведе партијата да изврши промена во законодавството што ќе му овозможи да биде кандидат за претседател.

Тој, исто така, платил до 10.000 долари на членовите на партијата за да ја поддржат неговата кандидатура пред изборите во 2013 година, тврдат американските власти.